Dyma’r tro cyntaf i’r ‘Grŵp Seneddol Trawsbleidiol i Gymru yn y Byd‘ gynnal digwyddiad / cyflwyniad yn agored i’r cyhoedd - mae wedi dewis gwneud hynny yn arbennig i Wythnos Cymru - ac mewn partneriaeth gyda Hybu Cig Cymru.
Trafodaeth banel fydd y digwyddiad, yn cynnwys cynrychiolwyr o arweinwyr ffermio a’r diwydiant bwyd yng Nghymru, gan fwrw golwg at sut all dau o allforion mwyaf eiconig Cymru - cig oen Cymru a chig eidion Cymru - ffynnu yn y cyfnod ôl Brexit.
Yn ddiweddar, mae Hybu Cig Cymru – Meat Promotion Wales (HCC) wedi cyhoeddi ymchwil newydd cyffrous sydd yn dangos bod Cymru’n cynhyrchu cig coch mewn ffordd fwy cynaliadwy na llawer o lefydd eraill ledled y byd.
Mae ffermio Cymru yn anelu at fod yn arweinydd byd-eang ym maes cynaladwyedd, a bydd hyn yn allweddol i sut gaiff y brand ei hybu.
Mae cyfleoedd enfawr ar gyfer brandiau cig oen a chig eidion premiwm, a all dystio manylion amgylcheddol uchel yn ogystal ag olrhain ac ansawdd rhagorol.
Cydnabyddir Cig Oen Cymru a Chig Eidion Cymru eisoes mewn llawer o wledydd. Mae masnach mewn cig oen i’r Dwyrain Canol er enghraifft wedi cynyddu’n sylweddol yn y ddwy flynedd ddiwethaf, ac mae’r potensial ar gyfer marchnadoedd eraill i agor.
Bydd y digwyddiad yn
canolbwyntio ar strategaethau i ddatblygu’r cynhyrchion eiconig hyn i adeiladu
brand byd-eang Cymru fel cartref y cynnyrch o’r ansawdd uchaf, wedi’i amaethu
yn y ffordd fwyaf cynaliadwy.
